ប្រជាពលរដ្ឋ11គ្រួសារអាចត្រលប់ទៅរស់នៅលើដីរបស់ពួកគេវិញក្រោយការបោសសម្អាតគ្រាប់មីន

ការសហការឧបត្ថម្ភនេះ​​ពន្លិចសំខាន់នូវសមិទ្ធិផលកិច្ចការងារជួយសង្គម​របស់ពួកយើង ហើយនឹងបន្តគាំទ្រដល់បេសកកម្មដ៍ប្រពៃនេះ។​

ពិធីប្រគល់ដីធ្លីនេះក៏បានធ្វើឡើងនៅទីតាំងដែលបានបោសសម្អាតមីនផ្ទាល់តែម្ដង​។​ ទីតាំងនេះស្ថិតនៅ​ ភូមិត្រពាំងក្រសាំង ឃុំស្រែនុយ ស្រុកវ៉ារិន ខេត្តសៀមរាប។​ ក្រុមគ្រួសារទាំង11​នឹងអាចប្រកបរបរកសិកម្មដាំដំឡូង ស្រូវ និងរស់នៅលើដីនេះដោយពុំមានក្ដីបារម្ភទៀតឡើយ។​ លោកពូ ណេត ប្រយ​​​ និងក្រុមគ្រួសារព្រមទាំងក្រុមគ្រួសារដទៃផ្សេងទៀតដែលទទួលបានដីរបស់ពួកគាត់ត្រឡប់ទៅវិញប្រកបដោយសុវត្ថិភាព និងសេចក្តីរីករាយក្រោយប្រតិបត្តិការបោសសម្អាតគ្រាប់មីន។​

រយៈពេលកន្លងមកពួកគាត់ត្រូវសម្រេចចិត្តផ្លាស់ទីលំនៅទៅកន្លែងផ្សេងព្រោះដីរបស់គាត់សិ្ថតនៅក្រោមការគម្រាមកំហែងពីគ្រោះថ្នាក់ដល់អាយុជីវិតរបស់ គ្រាប់យុទ្ធភ័ណ្ឌមិនទាន់ផ្ទុះ។​ លោកពូ ប្រយ​ពិតជាត្រេកអរ និងសូមថ្លែងអំណរគុណយ៉ាងជ្រាលជ្រៅដល់ក្រុមការងារអាប៉ូប៉ូ​ និង​ ធនាគារ ភីភីស៊ីប៊ែងដែលបានឧបត្ថម្ភដល់ប្រតិបត្តិការមួយនេះឲ្យប្រព្រឹត្តិទៅដោយជោគជ័យ។ ចាប់ពីពេលនេះទៅក្រុមគ្រួសារលោកពូ និងក្រុមគ្រួសារដទៃទៀតនឹងអាចរកចំណូលពីការដាំស្រូវ​និងដំឡូងនៅលើដីនេះដោយគ្មានភាពភ័យខ្លាចទៀតហើយ។​

នាយករងប្រតិបត្តិជាន់ខ្ពស់នៃធនាគារ ភីភីស៊ីប៊ែង,​ លោក​ ញក់ គឹមស្រូយ​ មានប្រសាសន៍ថា “ឃើញស្នាមញញឹមរបស់ក្រុមគ្រួសារនិងកូនៗរបស់ពួកគាត់ពិតជាធ្វើឲ្យយើងមានការរំភើបដែលការសហការនេះអាចជួយជ្រោមជ្រែង និងផ្លាស់ប្ដូរជីវភាពរស់នៅរបស់ពួកគាត់មួយចំណែកធំ។” លោក គឹមស្រូយបានបន្ថែមថា “ដើម្បីសម្រេចគោលដៅនៅឆ្នាំ2025​ក្នុងការធ្វើឲ្យកម្ពុជាក្លាយជាប្រទេសគ្មានមីន និងគ្រាប់យុទ្ធភ័ណ្ឌ​មិនទាន់ផ្ទុះ​ យើងនៅមានផ្លូវដ៏វែងឆ្ងាយទៀត។ ហើយយ៉ាងណាមិញធនាគារភីភីស៊ីប៊ែងនឹងបន្តសហការឧបត្ថម្ភ​ដល់អង្គការអាប៉ូប៉ូ​ក្នុងបេសកកម្មជួយសង្គ្រោះជីវិតប្រជាជនកម្ពុជាទាំងមូល។​”

លោកមេឃុំ​ ហ៊ាង គង់ មានប្រសាសន៍ថា​ “យើងសូមថ្លែងអំណរគុណយ៉ាងជ្រាលជ្រៅដល់ ធនាគាភីភីស៊ីប៊ែងដែលបានឧបត្ថម្ភដល់កណ្ដុរអាប៉ូប៉ូ និងអ្នកមើលថែកណ្ដុរហិតមីន។​ ទឹកចិត្តដ៏សប្បុរសរបស់​ធនាគារពិតជាបានជួយការពារដល់អនាគតរបស់កម្ពុជា។​ កូនចៅរបស់ពួកយើងទទួលបានសុខសុវត្ថិភាពផ្លូវកាយនិងចិត្តក្នុងការសិក្សារៀនសូត្រដូចក្មេងៗដ៏ទៃទៀតផងដែរ។​

វាពិតជាមានន័យណាស់សម្រាប់ពួកយើងទាំងអស់គ្នា​​ ហើយយើងក៏សូមជូនពរដល់ធនាគារឲ្យទទួលបានជោគជ័យគ្រប់ភារៈកិច្ចនាពេលអនាគត។​”

ធនាគារភីភីស៊ីប៊ែងមានមោទនភាពដែលបានចូលរួមចំណែក​ក្នុងការធ្វើការឲ្យការរស់នៅរបស់មនុស្សជំនាន់ក្រោយកាន់តែមានសុវត្ថិភាព។​​ ទោះបីជាបច្ចុប្បន្នភាពនៃពិភពលោកមានស្ថានភាពលំបាក ប៉ុន្តែយើងត្រេកអរដែលក្នុងពេលនេះយើងអាចជួយដល់ប្រជាជនខ្មែរ និងអាចឲ្យគាត់ចងចាំពេលវេលាដ៏មានន័យនៅថ្ងៃនេះ។​

យើងក៏សង្ឃឹមថាការសហការរបស់យើងនេះនឹងជម្រុញឲ្យមានការចូលរួមបន្ថែមពីសំណាក់ក្រុមហ៊ុននានាក្នុងការជួយគាំទ្រអង្គការអាប៉ូប៉ូក្នុងបេសកកម្មបោសសម្អាតមីន ហើយប្រតិបត្តិការកន្លងមករបស់អង្គការអាប៉ូប៉ូបានផ្ដល់លទ្ធផលវិជ្ជមានដែលមិនអាចកាត់ថ្លៃបានដល់ប្រជាជនកម្ពុជាឲ្យចៀសផុតពីផលប៉ះពាល់នៃគ្រាប់មីន​និងគ្រាប់យុទ្ធភ័ណ្ឌមិនទាន់ផ្ទុះ។​